Zemin: A Poula ch’a Cangia Pittansa à ògni Pòrto

In Liguria o zemin a l’é unna pittansa de magro: çeixai ò faxeu co-e giæe inte l’introtæra, seppie ò stocchefisce «à zemin» in sciâ còsta. A poula, documentâ in zeneise da-o secolo XVI, a s’imbarca fito: in Toscaña a vëgne o condimento do pescio, in Còrsega azziminu a l’é a suppa de pescio, e à Sasciai – sorpreisa – lo ziminu o l’é un arròsto de ventraggi, vanto gastronòmico da çittæ.

In sce l’etimo se discutte: contra a vegia ipòtexi araba (samīn, «grascia»: ben ben stramba, pe unna pittansa de magro), o Toso o propoñe o latin azymus, «sensa crescente», passou à «de magro». Unna poula, tante coxiñe.