O Primmo «Pesto» o l’Ea sensa Baxaicò

A poula a l’é antiga: pestâ o l’é za inti versci de l’Anònimo Zeneise, e do secolo XVI o Poulo Foggetta o nòmina «ro pesto dri mortè» – ma o l’é un battuo d’aggio e noxe. O baxaicò (poula ch’a ne ven da-o grego) o s’unisce à l’aggio pe condî e lasagne solo che into Settecento, inte comedie do Steva De Franchi; ancon do 1851 o diçionäio do Casassa o l’ammette into pesto a persa ò o porsemmo, e a primma reçetta codificâ a l’arriva do 1863.

Da lì a poula a fa o gio do mondo: pistou in Provensa, pesto à Gibertâ e à Bonesaire, fiña baseikòo, «baxaicò», into creolo de Seychelles. A sarsa ciù «tipica» de Zena a l’é, comme tutte e poule, delongo in viægio.