Donde Van, unn’Atra Zena ghe Fan

Tra o secolo XIII e o XIV un poeta sensa nomme – l’Anònimo Zeneise – o l’à scrito un muggio de versci in volgare zeneise: poexie morale e religiose, scene de vitta da çittæ, vittöie navale da Superba.

E o l’é lê ch’o l’à dæto a fotografia ciù antiga da vocaçion zeneise pe-o mondo: «E tanti sun li Zenoexi, e per lo mondo sì destexi, che und’eli van o stan, un’atra Zenoa ge fan». Setteçento anni primma di quartê liguri de Bonesaire e Gibertâ, a diaspora a l’ea za stæta scrita in versci.